Job 14

1 “Umuntu ozelwe ngumfazi ulezinsuku ezilutshwana njalo ezigcwele uhlupho.

2 Uyaqhakaza njengeluba aphinde abune; njengesithunzi esithi tshazi, akemi.

3 Onjalo ungala ulokhu umkhangele na? Ungammisa phambi kwakho umthonisise na?

4 Ngubani ongaveza okuhlambulukileyo kokungcolileyo na? Kakho!

5 “Izinsuku zomuntu zimisiwe; uzibekile izinyanga zokuphila kwakhe wabeka imikhawulo angeke ayeqe.

6 Ngakho-ke myekele ungazihluphi ngaye, aze aqede lesosikhathi sakhe njengomuntu oqatshiweyo.

7 “Kungaba lethemba ngesihlahla; singaganyulwa siyahluma njalo, amahlumela aso kawayikwahluleka ukukhula.

8 Izimpande zaso zingaguga phansi emhlabathini lesiphunzi saso sife emhlabathini,

9 kodwa singezwa amanzi siyahluma sikhuphe izingatsha njengesihlahla esitsha.

10 Kodwa umuntu uyafa alaliswe phansi; uphefumula okokucina angabe esaba khona.

11 Njengamanzi esitsha elwandle lanjengomfula ucitsha amanzi wome qha,

12 ngokunjalo umuntu ulala phansi angabe esavuka; kuze kutshabalale amazulu abantu kabayikuvuka kumbe baphatshanyiswe ebuthongweni babo.

13 Aluba ungangifihla ethuneni ungithukuze ulaka lwakho luze ludlule! Aluba ungangibekela isikhathi ube usungikhumbula!

14 Umuntu angafa uphinde aphile na? Zonke izinsuku zokutshikatshika kwami ngizalindela isikhathi sokuyekelwa kwami.

15 Uzabiza lami ngizasabela; uzasifisa lesosidalwa esenziwa yizandla zakho.

16 Ngeqiniso lapho uzabala izinyathelo zami kodwa kawuyikulandelela izono zami.

17 Iziphambeko zami zizananyekwa emgodleni; uzasigubuzela isono sami.

18 “Kodwa njengentaba ikhumuzeka ize ibhidlike, lanjengedwala lisuduka endaweni yalo,

19 njengamanzi awagubhayo amatshe lezikhukhula ziwuhugula umhlabathi, kanjalo uyalibhidliza ithemba lomuntu.

20 Umehlula kanye angaphindi aze adlule; uyabuguqula ubuso bakho umxotshe.

21 Nxa amadodana akhe ezuza udumo yena kasakwazi.

22 Uzwa kuphela ubuhlungu bomzimba wakhe azikhalele yena.”